కాటేదాన్‌లో కల్తీ అల్లం-వెల్లుల్లి పేస్ట్ గుట్టు రట్టు టన్నుల కొద్దీ స్వాధీనం ఒకరు అదుపులో

కాటేదాన్‌లో కల్తీ అల్లం-వెల్లుల్లి పేస్ట్ గుట్టు రట్టు టన్నుల కొద్దీ స్వాధీనం ఒకరు అదుపులో

హైదరాబాద్, ఏప్రిల్ 1, (వెలుగు నాడు ప్రతినిధి ) : హైదరాబాద్ నగర పరిధిలోని కాటేదాన్ ప్రాంతంలో కల్తీ అల్లం-వెల్లుల్లి పేస్ట్ తయారీ చేస్తున్న ఒక అక్రమ యూనిట్‌ను అధికారులు గుర్తించి దాడులు నిర్వహించారు. ఈ దాడుల్లో హానికర రసాయనాలను ఉపయోగించి తయారు చేసిన సుమారు 4,000 కిలోల కల్తీ అల్లం-వెల్లుల్లి పేస్ట్‌ను స్వాధీనం చేసుకున్నారు. అదనంగా, 6,000 కిలోల ముడి పదార్థాలను కూడా అధికారులు పట్టుకున్నారు. ఈ అక్రమ కార్యకలాపాలకు సంబంధించి హసన్ అలీ అనే వ్యక్తిని అదుపులోకి తీసుకొని విచారణ కొనసాగిస్తున్నారు. ప్రాథమిక విచారణలో ఈ పేస్ట్‌ను అపరిశుభ్ర పరిస్థితుల్లో తయారు చేసి మార్కెట్‌లో విక్రయిస్తున్నట్లు వెల్లడైంది. ఈ ఘటన నేపథ్యంలో ప్రజలు మార్కెట్‌లో లభించే అల్లం-వెల్లుల్లి పేస్ట్ నాణ్యతపై ఆందోళన వ్యక్తం చేస్తున్నారు. వినియోగదారులు ఆహార పదార్థాలను కొనుగోలు చేసే సమయంలో నాణ్యత, తయారీ సంస్థ వివరాలు గడువు తేదీలను తప్పనిసరిగా పరిశీలించాలని అధికారులు సూచించారు. ప్రభుత్వం తరఫున ఇటువంటి కల్తీ ఆహార పదార్థాల తయారీ, విక్రయాలపై కఠిన చర్యలు తీసుకుంటామని అధికారులు హెచ్చరించారు. ప్రజల ఆరోగ్యాన్ని కాపాడడం కోసం ఇలాంటి అక్రమ యూనిట్లపై నిరంతర తనిఖీలు కొనసాగిస్తామని తెలిపారు