భారీ ప్రమాదం తప్పిన ఆర్టీసీ బస్సు

భారీ ప్రమాదం తప్పిన ఆర్టీసీ బస్సు

స్టీరింగ్ రాడ్ విరగడంతో పొలాల్లోకి దూసుకెళ్లిన బస్సు… భయాందోళనలో ప్రయాణికులు

ఏపీ బ్యూరో మే17 , (వెలుగు నాడు ప్రతినిధి) : డోన్ నుంచి యాడికి, వైపు వెళ్తున్న ఆర్టీసీ బస్సుకు ప్రమాదం తృటిలో తప్పింది. ప్రయాణమధ్యలో బస్సు స్టీరింగ్ రాడ్ అకస్మాత్తుగా విరగడంతో వాహనం అదుపుతప్పి రోడ్డుకు పక్కనున్న పొలాల్లోకి దూసుకెళ్లింది. ఈ ఘటనతో బస్సులో ఉన్న ప్రయాణికులు తీవ్ర భయాందోళనకు గురయ్యారు.సమాచారం ప్రకారం, బస్సు సాధారణంగా ప్రయాణిస్తుండగా ఒక్కసారిగా స్టీరింగ్ పనిచేయకపోవడంతో డ్రైవర్ వాహనాన్ని అదుపు చేయడానికి ప్రయత్నించాడు. అయితే స్టీరింగ్ రాడ్ కట్ కావడంతో బస్సు రహదారి నుంచి పక్కకు వెళ్లి పొలాల్లోకి చేరింది. అదృష్టవశాత్తూ బస్సు వేగం తక్కువగా ఉండటంతో పెద్ద ప్రమాదం తప్పినట్లు తెలుస్తోంది.ఘటన జరిగిన వెంటనే ప్రయాణికులు ఒక్కసారిగా కేకలు వేస్తూ భయంతో బయటకు పరుగులు తీశారు. కొంతసేపు అక్కడ ఉద్రిక్త పరిస్థితులు నెలకొన్నాయి. అయితే ఈ ప్రమాదంలో ఎవరికి గాయాలు కాలేదని సమాచారం. దీంతో ప్రయాణికులు ఊపిరిపీల్చుకున్నారు.స్థానికులు ఘటనాస్థలానికి చేరుకుని ప్రయాణికులకు సహాయం చేశారు. అనంతరం ఆర్టీసీ అధికారులు మరో బస్సు ఏర్పాటు చేసి ప్రయాణికులను గమ్యస్థానాలకు పంపినట్లు తెలిసింది. ఈ ఘటనతో ఆర్టీసీ బస్సుల నిర్వహణపై మరోసారి ప్రశ్నలు తలెత్తుతున్నాయి. పాతబడిన బస్సులను సకాలంలో తనిఖీ చేసి మరమ్మతులు చేయాలని ప్రయాణికులు కోరుతున్నారు. చిన్న నిర్లక్ష్యం కూడా భారీ ప్రమాదాలకు దారితీసే అవకాశం ఉందని స్థానికులు అభిప్రాయపడుతున్నారు.