విజేతలకు బహుమతులు అందజేసిన ఎమ్మెల్యే శ్రీ శ్రీరాం రాజగోపాల్ (తాతయ్య)

విజేతలకు బహుమతులు అందజేసిన ఎమ్మెల్యే శ్రీ శ్రీరాం రాజగోపాల్ (తాతయ్య)

జగ్గయ్యపేట మే 31, (వెలుగు నాడు ప్రతినిధి) .పట్టణంలోని ఆర్టీసీ డిపో గ్రౌండ్‌లో గత 20 రోజులుగా ఐపీఎల్ తరహాలో అత్యంత ఉత్సాహభరితంగా నిర్వహించిన అమేసియా ప్రీమియర్ లీగ్ (APL) క్రికెట్ టోర్నమెంట్ ఆదివారం ఘనంగా ముగిసింది. యువతలో క్రీడా స్ఫూర్తిని పెంపొందించే లక్ష్యంతో నిర్వహించిన ఈ టోర్నమెంట్‌లో నియోజకవర్గంలోని పలు ప్రాంతాల నుంచి జట్లు పాల్గొని ప్రేక్షకులను అలరించాయి.టోర్నమెంట్ ఫైనల్ మ్యాచ్‌లో లింగగూడెం సూపర్ జెయింట్స్ మరియు వేదాద్రి రాయల్స్ జట్లు తలపడగా, ఉత్కంఠభరితంగా సాగిన పోరులో లింగగూడెం సూపర్ జెయింట్స్ జట్టు విజేతగా నిలిచింది. వేదాద్రి రాయల్స్ జట్టు రన్నరప్‌గా నిలిచి ప్రశంసలు అందుకుంది. మ్యాచ్‌ను వీక్షించేందుకు భారీ సంఖ్యలో క్రీడాభిమానులు హాజరై ఆటగాళ్లను ఉత్సాహపరిచారు.అనంతరం నిర్వహించిన బహుమతి ప్రదానోత్సవ కార్యక్రమానికి ముఖ్య అతిథిగా హాజరైన జగ్గయ్యపేట శాసనసభ్యులు మరియు తెలుగుదేశం పార్టీ పొలిట్ బ్యూరో సభ్యులు శ్రీ శ్రీరాం రాజగోపాల్ (తాతయ్య) గారు విజేతలు, రన్నరప్ జట్లకు ట్రోఫీలు, నగదు బహుమతులు అందజేసి అభినందించారు.ఈ సందర్భంగా ఎమ్మెల్యే శ్రీరాం రాజగోపాల్ (తాతయ్య) మాట్లాడుతూ.క్రీడలు యువతలో క్రమశిక్షణ, నాయకత్వ లక్షణాలు, జట్టు భావన మరియు పోటీతత్వాన్ని పెంపొందిస్తాయని అన్నారు.గ్రామీణ ప్రాంతాల్లో దాగి ఉన్న క్రీడా ప్రతిభను వెలికితీసేందుకు ఇటువంటి టోర్నమెంట్లు ఎంతో ఉపయోగపడతాయని పేర్కొన్నారు. యువత క్రీడలతో పాటు విద్యలోనూ రాణించి ఉన్నత లక్ష్యాలను సాధించాలని ఆకాంక్షించారు.గత 20 రోజులుగా విజయవంతంగా టోర్నమెంట్‌ను నిర్వహించిన నిర్వాహకులను ఎమ్మెల్యే ప్రత్యేకంగా అభినందించారు. క్రీడాకారులకు అవసరమైన ప్రోత్సాహం అందించడంలో తాను ఎల్లప్పుడూ ముందుంటానని, నియోజకవర్గంలో క్రీడల అభివృద్ధికి అవసరమైన సహకారం అందిస్తానని హామీ ఇచ్చారు.ఈ కార్యక్రమంలో పట్టణ తెలుగుదేశం పార్టీ ప్రధాన కార్యదర్శి మైనేని రాధాకృష్ణ మరియు తెలుగుదేశం పార్టీ నాయకులు, క్రీడా సంఘాల ప్రతినిధులు, యువకులు, అభిమానులు మరియు భారీ సంఖ్యలో ప్రజలు పాల్గొన్నారు. విజేత జట్ల ఆటగాళ్లను ఘనంగా సత్కరించి వారి క్రీడా ప్రతిభను కొనియాడారు.